1) Zainab sifat behen thi Imame raza ki bhi
Jo beqaraar rehti thi furqat me bhai ki
Bhai ke hi qayaal me din raat roti thi
Masooma Qum ke naam se mashhoor hogayi
Yasrab me thi firaaq ki ghadiyaa'n sahe huwe
Muddat huwi thi bhai ko iraa'n gaye huwe
2) Bhai behen me fitri mohabbat quda ne di
Nemat bashar ko ye karame kibriya ne di
Khooe wafa jahan ko rabbe ulaa ne di
Khaslat wila ki khaliqe ahle wila ne di
Dil me behen hai bhai ki ulfat liye huwe
Bhai bhi hai behen ki mohabbat liye huwe
3) Kehti thi kab watan ko mere bhai aaoge
Kab aake mujhko chehrae anwar dikhaoge
Apni behen ko apni sada kab sunaoge
Aate nahi agar to mujhe kab bulaoge
Marti hu mai ajal ke barabar hai zindagi
Bhai baghair aapke do bhar hai zindagi
4) Hai beqaraar aapki gham khaar bhai jaan
Aankhen hai ab firaaq me khoo'n baar bhai jaan
Nazro me hai wo aap ki raftar bhai jaan
Aati hai yaad aapki guftaar bhai jaan
Jalwa figan hai qalb me tanveer aap ki
Phirti hai meri aankhon me tasweer aap ki
5) Bhai mera har ek nafas nauha khan hai
Zindaan me firaaq ke mehboos jaan hai
Andher meri chashm me sara jahan hai
Ghar me nahi hai aap toh khali makaan hai
Tashreef laake qalb mera shaad kijiye
Sunsaan is makaan ko abaad kijiye
6) Aati thi is behen ko kabhi karbala ki yaad
Abbas ke qayaal me aayi wafa ki yaad
Ek mehshar qayaal thi shaahe huda ki yaad
Tasweer e khoo'n thi Qasim e gulgoo'n qaba ki yaad
Is tarha is behen ko baradar ki yaad thi
Sughra ko jis tarha Ali Akbar ki yaad thi
7) Rumaal apna karti thi ye aansuo'n se tar
Soze firaaq se huwe sozaa'n dil o jigar
Karti thi umr hasrate deedaar me basar
Aakhir ko ek roz huwi aazime safar
Furqat me zabt ho na saka bas nikal padhi
Iraa'n ki simt apne watan se ye chal padhi
8) Pohnchi hai shehre qum ke qaree'n jab ye qasta jaa'n
Aaya waha'n nigaah me is ki ajab samaa'n
Yaani siyaah posh hai sab log nauha khaa'n
Karte hai apna seena o sar peet kar fughaa'n
Pehne huwe libaas hai sab ehle gham siyaah
Basti ke har makaan pa dekha alam siyaah
9) Hamsheera ne Raza ki ju'nhi dekha ye samaa'n
Boli ke kya huwi hai qayamat karo bayaa'n
Aankho se ehle shehr ke aansu hai kyu rawaa'n
Haatho me sabke kis liye hai ye siyaah nashaa'n
Ab dil ko mere taab nahi maajra kaho
Aye logo ab khuda keliye kya huwa kaho
10) Bole ye ehle shehr ke aye jaan Fatima
Kyunkar zabaa'n hamari kahegi ye maajra
Mehshar se pehle hashr khurasaa'n me hogaya
Bibi tumhare qalb ko ab sabr de khuda
Kyunkar kahe ke aap ka bhai huwa shaheed
Mamoon ne Imame Raza ko kiya shaheed
11) Mehwe buka huwi ye qabar sunke dil hazee'n
Takraa rahi thi chob se mehmil ki wo jabee'n
Kehti thi mere qalb ko ab taab hi nahi'n
Naaqa mera bithaado quda keliye yahi'n
Dunya me ab na aik ghadi chain paaungi
Bhai nahi'n hai jab toh watan ko na jaaungi
12) Boli sidhaare sooe jinaa'n mere bhai jaa'n
Tareek hai nazar me jaha'n mere bhai jaa'n
Imaa'n ki jaan roohe zamaa'n mere bhai jaa'n
Dhoondhu tumhe mai bolo kaha'n mere bhai jaa'n
Aage na ab mai ek qadam bhi badhaaungi
Qum ki zamee'n pa ek nayi basti basaaungi
13) Bekas ye iske baad hi bistar nashee'n huwi
Bhai ka daagh dil pa tha do bhar thi zindagi
Din raat yaad karke baradar ko roti thi
Kuch roz aise haal hi me zindagi gayi
Dukh badhgaya jo zabt ki had ke nashaan se
Bhai ke gham me chal basi aakhir jahaan se
14) Ek ghul utha ke bhai ki gham khaar margayi
Aayina daare itrate at'haar margayi
Masooma dil figaar azadar margayi
Bin bhai ke thi zindagi dushwar margayi
Baqar baghair bhai ke zinda na rehsaki
Hamsheer ye judaai na bhai ki sehsaki