jisdam nagin-e khaatim-e paighambaraa'n giraa
rounaq uthi zamee'n se imaam-e zamaa'n giraa
girne pa sab giroh liye barchiyaa'n giraa
hae hae na in jafaao'n pa bhi aasmaa'n giraa
zehra se poochiye ye qalaq noor-e ain ka
tapna zamee'n ka aur tadapna hussain ka
mushtaaq-e ser-e zibha bade afsaraan-e kee'n
qaatil kayi khade huwe aakar qaree'n qaree'n
koi pukaara haa'n koi bola abhi nahi
ab der kya hai sajde me rakh lene do jabee'n
awaaz di umar ne hai gardan dhali huwi
qaatil pukaara aankh abhi hai khuli huwi
sab tham gaye magar na thama shimr -e bad shiyam
sar peetne ki jaa hai rakha us jaga qadam
seena daba to aur bhi tadpe shah-e umam
shor-o fughaa'n suna isi haalat me dam badam
qaatil se poocha dekh kidhar ghul ye hota hai
hai hai hussain ke koi ran me rota hai
wo bola koi hoga mai dekhoo'n bhala kidhar
ab tegh par nigaah hai sheh rag pa hai nazar
haa'n jab sawaar hone laga tha mai seene par
saidaani ek qaime se nikli thi nange sar
is dam hamaari fouj me to eid hoti hai
mujh ko yaqeen hai ye wahi bibi roti hai
shah bole aur koi nahi ye bahen bahen
aashiq bahen hussain ki tashna dahan bahen
bhooli hamaare pyaar me maa ka chalan bahen
balwa kahaa'n, kahaa'n ye meri qasthatan bahen
qaatil pukaara aage bhi baahar ye aayi thi
sheh bole jab sinaa'n yeh ali akbar ne khaayi thi
aage hai wo maqaam ke ghash honge mominee'n
ye saamne hussain hai wo zainab-e hazee'n
gardan pa tegh dil me sinaa'n seene par laee'n
zainab ye haal dekhti hai aur bas nahi'n
na mehrumo'n ka dhyaan na parde ka hosh hai
ye sab lahu ka josh hai ulfat ka josh hai
wo rona bekasi ka wo ghabraana yaas ka
wo thartaraana dil ka wo udna hawaas ka
kehna bilak bilak ke ye kalma hiras ka
aye shimr waasta ali asghar ki pyaas ka
lillah teen roz ke pyaase ko chod de
sadqa nabi ka unke nawaase ko chod de
tham jaa quda ko maan habeeb-e quda ko maan
zehra ko maan hazrat-e mushkil kushaa ko maan
saugand faqr-e faaqa-e aal-e abaa ko maan
apni rasool zaadi ki tu iltejaa ko maan
saare buzurg margaye mujh bad naseeb ke
mera koi nahi hai siwa is ghareeb ke
aye shimr paas bhai ke aau'n jo tu kahe
zaqmou se jalti ret chudhaou'n jo tu kahe
chadar badan ke neeche bichaau'n jo tu kahe
bekal hai sar mai aake uthau'n jo tu kahe
paani to yaa'n milega na zehra ki jaayi ko
aansu chidak ke hosh meh laaungi bhai ko
aye shimr mai gale se lagaaloo'n to zibha kar
bhai se milke qaime meh jaaloo'n to zibha kar
kuch dard apne dil ka sunaaloo'n to zibha kar
syed ko qibla roo mai litaaloo'n to zibha kar
paani to bhooke pyase ko aye badqisaal de
hai waqt-e zibha aankho'n pa kapda to daal de
aye shimr tujhko qaaleq-e akbar ka waasta
aye shimr tujhko rooh-e payambar ka waasta
aye shimr tujhko hyder-e safdar ka waasta
aye shimr tujhko nanhe se asghar ka waasta
lillah kar na zibha shah-e mashraqain ko
mai bheek maangti hoon mujhe de hussain ko
ye kehte kehte sust huwi dam ulat gaya
sar peet'ti ye rehgayi sar sheh ka kat gaya
yu'n laash par giri ke jigar sab ka phat gaya
baahe'n gale me daalke laasha lipat gaya
maa ki tarha thi aashiq-e shaah-e zaman bahan
ye bhai bhai kehti thi laasha bahan bahan