ran se jab khake sinaa'n akbar -e- zishaa'n aaye
maa ki qidmat me koi aan ke mehmaa'n aaye
ghar me laashe ko liye shaah -e- shahidaa'n aaye
nouha gar qaak basar chaak garebaa'n aaye
di sada qatl huwe yousuf -e- saani bano
mil gayi qaak me akbar jawani bano
dekhle aaqri deedar pisar marta hai
saamne ankho'n ke ye noor-e- nazar marta hai
ab koi dam me mera rashke qamar marta hai
mu se baahar hai zabaa'n tishna jigar marta hai
dam hai seene me ruka zakhmo'n se khoo'n jaari hai
shahar bano tera ghar lutne ki tayyari hai
pahonchi qaime me jo hazrat ko ye purdard sadaa
muztarib hogaye naamoose rasoole dosara
kaha chilla ke sakina ne ke hai hai bhaiyya
fizza doudi sooe dar phaink ke sar par se ridaa
peet'ti zainab -e- muztar nikal aayi baahar
baano ghabra ke khule sar nikal aayi baahar
shah ke kaandhe pa jo dekha ali akbar ko nidhaal
haath phaila ke ye chillayi ke hai hai mere laal
kya ghazab hogaya aye baad-e- shah-e- nek qisaal
raas aaya na mere bacche ko attarwaa'n saal
tukde tegho'n se badan hogaya saara hai hai
koun tha jis ne mere sher ko maara hai hai
roke bano se ye farmane lage sarwar-e- dee'n
sar na peeto abhi zinda hai mera maah-e jabee'n
saans aati hai pa har dam hai dame baade pasee'n
kooch inka bhi hai aur ham bhi hai marne ke qaree'n
sab chute ab na raha koi hamara baano
is jawaa'n bete ke gham ne hame maara baano
sun ke maadar ki sadaa khol diye dida -e- nam
haath utha kar kaha ro-o na mere sar ki qasam
paas aakar hame chaati se lagalo is dam
ran se aaye hai tumhaari hi mulaaqaat ko ham phir ye ghar shaah ke iqbaal se dekha hamne par tumhe aake ajab haal se dekha hamne
baal kyu bikhre hai kyu phaink di sar par se rida
neel kyu seeene pa hai kyu hai garebaan phata
qaak kyu mu pa mali ho ye pisar tum pa fida
shaah dunya me salamat rahe ye kya ye kya
lut gayi ye na suqan mu se nikaalo amma
mai to jeeta hoon kaleje ko sambhalo amma
zaqmi hone ki mere kis ne qabar pohnchaayi
jhoot hai mai ne to hargiz nahi barchi khaayi
aap tak bete ko taqdeer salamat laayi
dekhe hazrat ke qadam tan me mere jaa'n aayi
marg se pahle ho maatam ye zaboo'n hai amma
mere kapdo'n pa to abbas ka qoo'n hai amma
boli bano ke jo kehte ho khuda yu'n hi kare
aye mere laal ye maa teri balaa leke mare
laao dho daalu'n mai jo khoon me kapde hai bhare
chaand se haath hai phir kis liye chaati pa dhare
mujh ko maalum huwa qalq se jaate ho tum
mere rone ke liye zaqm chupate ho tum
bano sadme se na marjaye ye dar hai beta
sab tere dil ki mere dil ko qabar hai beta
haaye seena ye tera khoon me tar hai beta
phir ye kya hai jo nahi zaqme jigar hai beta
san'sanaata hai jigar jaan chali jaati hai
is lahu se to mere doodh ki boo aati hai
aarzu hai ke phale phule mera naqle muraad
tum dulhan byaah ke laao mera ghar ho aabaad
dehkh loo'n ankhou'n se apne mai tumhari aulaad
phir mai dunya se jo guzroo'n to rahe rooh bhi shaad
daadi kehlaaungi rutba mera bartar hoga
tera farzand bhi hamshakl -e- payambar hoga
aah ki sun ke ye akbar ne basad ranj-o- malaal
dard chaati me utha ghair huwa aur bhi haal
dil me ye soch ke rone laga wo nek qisaal
ham safar karte hai amma ko hai shaadi ka qayaal
bar me hoyega kafan qaak pa chehra hoga
naa dulhan hogi na aulaad na sehra hoga