Matam hai fazaon mein Shahey Kaun-o-Makaan Ka
Is gham sey fiza Kufay ki tharraayi huwi hai
Ab arsh pa ashkon ki ghataa chhaayi huwi hai
Aur taaron kay aankhon mein nami aayi huwi hai
Har zarre ki ashkon sey shanasaayi huwi hai
Woh Gham hai kay Islam ka larzaan hai sawairaa
Sakta hai har ek gaam pa sannaaton ka deiraa
Khaamosh fizaaon mein hai har samth andheiraa
Khoon rothaa hai unnisween Ramzaan ka sawairaa
Farqe ShaheyWaala huwa shaq zarbey sitam sey
Maula jo tadapney lagey Sar haathon sey thaamey
Hasnain ney roomaal kasaa sar pa Ali kay
Chehrey ko bhigothay hi bahey khoon kay dhaarey
Rothay huwey Abbas Ki Maa ney kaha Aaqa
Sadqey karun Abbas ko Tujh par sey Main Maula
Haider ney kaha yeh toh hai Shabbir ka fidiyaa
Aur hoga muhaafiz yehi Zainab ki ridaa ka
Kehney lagay Zainab sey Ali phir yeh tadap kar
Karta hoon Tujhey sabr ki talqeen Meri Dukhtar
Baazu mein rasan hoyegi chhin jaayegi chaadar
Hamraah na hoga koyi juz Abid-e-Muztar
Katt jaayengay Abbas e Alamdaar kay shaaney
Lut jaayega ghar asr ko jal jaayeingay khaimey
Phailengey joonhi shaam e ghareeban kay andheiray
Beti Meri pehraa Tujhey deyna hai akeiley
Zainab Tere aansu nahin Haider ko gawaarah
Karbal mein nahin dega Tujhe koyi dilaasa
Math ro Meri Beti kay abhi zindaa hai Baba
Phir ro diye khud shaanon ko aankhon sey lagaya
Jab sab ko Ali ney kiya Shabbar kay hawaaley
Bey chain huwey suntey hi Abbas kay naaley
Seeney sey laga kar kaha aankhon kay ujaaley
Abbas Tujhe karta hoon Sarwar kay hawaaley
Aansoon nikal aaye junhi lab choomey Hasan kay
Girya kiya Sarwar kay galay kay liye bosey
Phir aakhri angdaayi li aur bachchon sey boley
Karta hoon tumhein Khaliq e Akbar kay hawaaley