Kaisa waqt badla hai kaisa ye zaman hai
Kaun Kisko batlaay Kiska Ye Gharana hai
Bekajawa unkto'n par karwa'n rawana hai
Arsh Jiska Maskan tha ab wo bethikana hai
Qafela Gharibo'n ka Qaid hoke jaata hai
Aftab ke rukh par teergi si chhai hai
Karbala ki dharti ke lab pa bhi duhaai hai
Tashnagi Shaheedo'n ki khoon me nahaai hai
Bekafan hain sab Laashe pas me taraai hai
Qafela Gharibo'n ka Qaid hoke jaata hai
Ab na aayga Lab par phir sawal pani ka
Algqama pashema'n hai sharmsaar Mashkeeza
Aur Kinaare dariya ke Muztarib hai ek Laasha
Rukh pa hai Yateemi ke Tashnagi ka sannata
Qafela Gharibo'n ka Qaid hoke jaata hai
Ek Yateem Bachchi ke zakhm kitne gahre hain
Kamsini ki raho'n me kitne zulm thehre hain
Soye kaise aankhon me zalimo'n ke chehre hain
Aankh ro nahi sakti aansuo'n pa pehre hain
Qafela Gharibo'n ka Qaid hoke jaata hai
Sab nashaniya'n jal kar khaak me huwi mismaar
Garm raakh me koi dhoondta hai kuch aasaar
Ab na khaali jhoola hai aur na Bistare Bimaar
Bekaso'n pa har lanha zindagi huwi dushwaar
Qafela Gharibo'n ka Qaid hoke jaata hai
Tashnagi hai ghurbat hai bekasi hai aahe'n hain
Dasht hai aseeri hai aur zakhmi raahe'n hain
Chaadare'n nahi'n sar par muztarib nigaahe'n hain
Justju me bachcho'n ki maamta ki baahe'n hain
Qafela Gharibo'n ka Qaid hoke jaata hai
Paay sabr me kaante raasto'n ke daste hain
Dasht me aseeri ke aabele sisakte hain
Dhoop ki tamaazat se saare zakhm jalte hain
Chashme namm se behne ko ashk bhi tarste hain
Qafela Gharibo'n ka Qaid hoke jaata hai
Izteraab hai kitna dasht ki hawao'n me
Kyun lahu umadta hai bekasi ki ankhon me
Har taraf dhuwaa'n kyun hai tashnagi ki aaho'n me
Kis qadar hai tanhaayi maamta ki baaho'n me
Qafela Gharibo'n ka Qaid hoke jaata hai
Gar Rasheed turbat me zindagi ki haajat hai
Qalb ke dhadakne ko ashk ki zarurat hai
Karbala ke pyaaso'n ka Gham badi Ibaadat hai
Zakhm Maatame Sheh ka rooh ki tahaarat hai
Qafela Gharibo'n ka Qaid hoke jaata hai