jab sar pe laga gurz to abbas pukaare
aye baad e saba jaake ye aqa ko batade
rehwaar se girta hoo'n maishaano'n ko katake
bebas hoo'n bohat haath nahi hai mere tan par
hai tapti zameen aur hoo'n mai zeen ke upar
hai kaun jo goudi me mujhe leke utaare
mashkeeze pe jab jab bhi huwi teero'n ki bochhaar
abbas ye hasrat se sada dete the har baar
teero'n se koi mashke sakina ko bachaale
haathon ke bina zeen pa sambhla nahi jaata
maqtal me mujhe kuch bhi dikhayi nahi deta
hai teer meri aankh me ab koun nikaale
saqqa e haram kehta tha ye sukhi zaba'n se
kya faayeda jeene ka agar pyaase hai bacche
ab ye hi duwa hai ke khuda mujhko uthale
zakhmo'n se badan choor hai tukdo'n me bata sar
bazu bhi nahi tan pa mai girta hu zamee'n par
dete hain sada behte huwe khoon ke dhare
tanhaayi ka mujhko hai sakina ka bohat gham
ye bojh nahi hoga mere dil se kabhi kam
bacchi meri khaayegi sitamgar ke tamache
pyaasi wo rahi jis ka mujhe kehte hain saqqa
ye dard bhi seene me mere saath rehega
khoo'n rote hain ghurbat pa meri chaand sitaare
ye zainabe muztar se koi kehde to jaakar
khaime me nahi aayega ab saaniye hyder
hai itrate at'haar shahedee'n ke hawale
ab chain se soyenge kaha'n aale payambar
har waqt yateemao'n ko satayenge sitamgar
sona hai mujhe aaj se dariya ke kanaare
saqqa e haram ne jo padha nouha ye aksar
mehsoos huwa karbobala me mujhe akber
jaise koi saqqa kahe dariya ke kanaare