baquar bhi the shareek-e shahinshaah-e tashnalab
sehraa-e karbala me uthaate rahe ta'ab
kam umr the to kya huwa majboor the ye kab
zor-e jawaa'n dikhate jo hoti raza e rab
hamjoli unke kaise lade is ladaai me
bachou ki dhaak bandh gayi tegh aazmaai me
manzoor haq ko rakn-e imaamat ka tha qayaam
daftar me ousiya ke raqam ho chuka tha naam
tha hukm-e zuljalaal ye ho paanchwe imaam
qaayam rahe shariyate paighambar-e anaam
dee'n imtehaane sabr buzurgou'n ki shaan se
hujjat tamaam karke sidhaare jahaan se
hamd-e quda me kat-te rahe imtihaa'n ke din
shaaker huwa qitaab-e shahinshaah-e ins-o jinn
qayam the hilm-e shaah ke sab kork-o min
har ranj me raha dil-e aagaah mutmaain
keena bhara huwa tha jo qalb-e hishaam me
takleef di bulaa ke madine se shaam me
paaband hukme haakim-e jaaber tha be adab
qeemat se koi cheez na dete the hai ghazab
faaqe se teen roz raha sarwar-e arab
jis tarha karbala me uthaaya tha ye ta'ab
guzre the waa'n bhi itne hi din bhook pyaas me
dil tha hujoom-o hasrath-o andoh-o yaas me
baaqer ke waaste marazul mout tha wohi
eeza-e saqt kul ke madadgaar ne sahi
taqat na uthne ki shah-e zeejaah me rahi
baqsha pisar ko aap ne roz-e yadullahi
sadma ajab tha jaafar-e saadiq ki jaan par
jaari wasiyate huwi jis dam zabaan par
rone lagaa pisar jo suna ye kalaam -e yaas
shah ne kaha quda ho nigahbaan na ho udaas
rakha huwa hai jo mere ahraam ka libaas
dena kafan usi se mujhe mera haq shinaas
nahlaana apne haath se aye mahjabee'n hame
padhkar namaaz qabr me rakhna tumhi hame
aawaaz deraha hai jigar gousha-e hussain
aaja ke aaj quld me hai mera noor-e ain
ye kahte kahte chup huwe sultaan-e mashraqain
laqte jigar ne aah ki aaya na dil ka chain
dekha ke haal ghair hai shaah-e anaam ka
qibla ki simth kardiya chehra imaam ka
tha jinke saamne ruq-e farzand-e mahlaqaa
aankhe'n wo band hogayi andher hogaya
jo dil rubaa se kah rahe the dil ka mud'duaa
qaamoosh wo zabaa'n aye waa musibataa
kya kya tha karb jis me basar teen din huwe
bejaan chouthe roz shah-e ins-o jinn huwe