Ahl-E- Haram Ka Monis-O-Ghamkhaar Margaya
Wo Zor-E- Baazu-E Shah-E- Abraar Margaya
Hae Hae Nashaan-E- Hyder-E- Karrar Margaya
Lashkar Huwa Tamaam Alamdar Margaya
Sarf-E- Buka Haram Me Shah-E- Mashraqain Ke
Rote Hain Kooze Phaink Ke Bacche Hussain Ke
Maara Gaya Taraai Pa Hyder Ka Laadla
Shaanoun Se Haae Dast-E- Mubaarak Huwe Juda
Paiwast ek Aankh Me Teer-E- Jafaa Huwa
Sar Gurz Aahni Se Hai Shaq Waa Musibata
Aisi Kisi Shaheed Pa Guzri Jafaa Nahi
Girte Hain Zee'n Se Haathoun Ka Bhi Aasra Nahi
Kyu Ro rahe Ho Aye Pisar-E- Shah-E- Mashraqain
Kya Guzri Khalb-E- Zaar Pa Hyder Ke Noor-E- Ain
Kuch To Kaho Zabaan Se Dil ko nahi Hai Chain
Aaya Hai Dekho Laash Pa Bhaai Teraa Hussain
Is Bekasi Me Jaate Ho Mu Apna Mod Ke
Ghurbath Me Kispe Jaate Ho Bhaai Ko Chodh Ke
Phir Roke Bole Shaah Ke Qadmoun Pa Rakh Ke Sar
Hai Arz Ye Ghulaam Ki Ya Syedul Bashar
Sharminda Hai Sakina Se Abbas-E- Naamwar
Laasha Hamara Leke Na Jaae'n Qayaam Par
Qaadim Ko Rahne Dijiye Aaqa Lab-E- Furaath
Maskan Rahe Ghulaam Ka Moula Lab-E- Furaath
Ye Kehte The Hussain Se Abbas-E- Nekh Naam
Hichki Ek Aai Ghash Ne Diya Mout Ka Payaam
Aankhen Jhuka Ke Sheh Ko Kiya Aaqri Salaam
Haathoun Se Dil Ko Thaam Liya Sarwar-E- Anaam
Ghurbath Me Shah-E- Deen Ko Be Aas Kar Gaye
Tanha Hussain Hogaye Abbas Margaye
Sar Uth Ke Peet-Te The Shainshaah-E- Do Jahaa'n
Sheh Ko Sambhaalte The Ali Akbar-E Jawaa'n
Kehe The Roke Bete Se Ye Sarwar-E- Zamaa'n
Abbas Ham Ko Chod Gaye Aye Pidar Ki Jaan
Kis Se Kahe Jo Guzra Hai Sadma Hussain Par
Dard-O- Alam Ka Aasmaa'n Toota Hussain Par
Aye Ibn-E- Fatema Ke Fidaai Uttho Uttho
Kaisi Tumhe Ye Neend Hai Aayi Uttho Uttho Kyun Tum Ne Ki Pasand Taraai Uttho Uttho
Bhaai Uttho Uttho Mere Bhaai Uttho Uttho
Labbaik Kehke Aate Nahi Ibn-E- Buturaab
Aawaaz Par Hussain Ki Dete Nahi Jawaab
Bhaai Bataao Qaime me Jaakar Mai Kya Kahoo'n
Be-Chain Hongi Aal-E- Payambar Mai Kya Kahoo'n
Nanhi Sakina Se Aye Baradar Mai Kya Kahoo'n
Pooche Mujhe Jo Zainab-E- Muztar Mai Kya Kahoo'n
Kaise Kahoo'n Taraai Pa Shabbir Lut Gaya
Abbas Ka Hussain Se Saath Aaj Chut Gaya
Ye Kehke Naher Se Chale Rote Huwe Imaam
Akbar Ne Mashk Aur Alam Ko Liya Tha Thaam
Pahonche Dar-E- Qiyaam Pa Jis Dam Shah-E- Anaam
Bhaai Se Lipti Doudh Ke Zainab Falak Maqaam
Kehti Thi Kyu Alam Hai Ye Khoo'n Me Bhara Huwa
Batlaao Bhaai Jaa'n Mera Abbas Kya Huwa
Zainab Se Tab Ye Kehne Lage Shah-E- Karbala
Hai Hai Ali Ke Sher Ke Baazu Huwe Judaa
Teer-E- Sitam Se Mashk Chidi Paani Behgaya
Maara Gaya Furaat Pa Saqqa Sakina Ka
Zainab Wo Mera Quwwat e Baazu Guzar Gaya
Abbas Qatl Kya Huwe Shabbir Margaya
Sun Sun Ke Sab Hussain Ki Guftaar Sakina
Lipti Pidar Se Aake Dilafgaar Sakina
Kehte The Shaah Ammu Ki Ghamqwhaar Sakina
Maare Gaye Darya Pa Alamdar Sakina
Kaisee Bataaun Unpa Mai Kya Kya Sitam Huwe
Darya Pa Tere Ammu Ke Shaane Qalam Huwe
Momin Bapaa Hae Maatam-E- Abbas-E- Qushqisaal
Zere Alam Hain Jamma Haram Khole Sar Ke Baal
Sar Peet-Te Hai Aal-E- Payambar Basad Malaal
Kehte The Shaah Ab Mera Jeena Huwa Mohaal
Shaane Kataake Sogaya Saqqa Taraai Me
Rassi Bandhegi Bint-E- Ali Ki Kalhaai Me.