umme laila ka pisar kya saahibe touqeer hai
hubahu tasweere ahmad dilbare shabbir hai
dekh kar soorat ali akbar ki kehte the hussain
aye ali akbar mere nana ki tu tasweer hai
aagaye akbar hussain ibne ali ki god me
daamane qura'n me goya aayate tat'heer hai
zaahiri dunya samajhti hai ali akbar jiye
chalti phirti ahmade muqtar ki tasweer hai
jaa rahe hai ran ko akbar fat'ha ya rab naseeb ho
aapke peeche duae hazrate shabbir hai
mustafa ki jung pehli baar aaegi nazar
aaj hamshakle nabi ke haath me shamsheer hai
namuraadi noujawani tashnagi ifraate gham
dard ki dunya hai to ek dard ki tasweer hai
jashn me is se zyada keh nahi sakta hu mai
qaabe akbar qaabe ibrahim ki tabeer hai
hai nabi ke qalb par quran to qalbe nabi
teri wo touqeer hai qura'n ki jo touqeer hai