DETI THI FATIMA ZEHRA YEHI ROROKE SADA, MERE MAZLOOM HUSSAIN HAYE MAZLOOM HUSSAIN
ASR ASHOOR TALAK LUT GAYA SAB GHAR TERA, MERE MAZLOOM HUSSAIN HAYE MAZLOOM HUSSAIN
Deen par Aun-o-Mohammad ne kiya khud ko fida
Jaan de daali pe dariya ki taraf rukh na kiya
Darmiyaa’n laasho’n ke Zainab ne kiya Shukr-e-Khuda
Tera har aik khadam deen pe ehsaan raha
Mere mazloom Hussain haye mazloom Hussain
Tapte sehra mein huwe Ibn-e-Hasan ki shaadi
Tashnalab teen dino ke the sabhi baarati
Haye Kubra ko na ek pal ye khushi raas aayi
Tune kin haatho se beti ko banaya bewaa
Mere mazloom Hussain haye mazloom Hussain
Sabke parde ka muhaafız mera Abbas-e-Jari
Hogaye haath judaa uspe qayamat tooti
Nargha-e-Zulm mein tanha tha, thi ghurbat ki ghadi
Qatl hote hi tere chhingayi Zainab ki rida
Mere mazloom Hussain haye mazloom Hussain
Jisko Atthara(18) baras naazo’n se maa ne paala
Uska barchhi se jigar hogaya paara paara
Bain karti rahi sar peetke Umm-e-Laila
Tune kis dil se jawaa’n laash uthayi beta
Mere mazloom Hussain haye mazloom Hussain
Pyaas se Asgher-e-Naadaan ka ajab alam tha
Sunke halmin ki sada baba ki nusrat ko chala
Zulm ne teer se chheda Ali Asgher ka gala
Haaye kin aankho’n se bachche ka tadapna dekha
Mere mazloom Hussain haye mazloom Hussain
Roz-e-Ashoor qayamat ka tha run mein manzar
Dasht-e-Ghurbat mein the bikhre huwe laash-e-aksar
The kahin Aun-o-Mohammed, kahin Qasim Akber
Tu dam-e-zibha bhi karta hi raha shukre khuda
Mere mazloom Hussain haye mazloom Hussain
Haaye zanjeero’n mein jagda huwa Abid ka badan
Tauq ke zulm se kat-ti rahi jiski gardan
The bandhe baara aseero ke gale aik rasan
Tere beemar ne kya dard ka manzar dekha
Mere mazloom Hussain haye mazloom Hussain
Pohoncha darbar-e-yazeedi mein luta ye kunba
Pesh-e-haakim the kuch is tarha khade Aal-e-abaa
Moo ko baalo se chhupaye the na thi sar pe rida
Naam leleke layee’n sabko sada deta tha
Mere mazloom Hussain haye mazloom Hussain
Mere bekas mere mazloom mere tashna-dahan
Haye ummath ne kiya tujhko jo awaara watan
Dasht-e-Ghurbat mein ujaada gaya mera gulshan
Kund khanjar se mere laal kata tera gala
Mere mazloom Hussain haye mazloom Hussain
Qaid khaane mein wo masoom Sakina ki fughaa’n
Baba aajaiye ab tan se nikal jaye na jaa’n
Mera dam ghut-ta hai tareek bohot hai zindaa’n
Bain karti rahi masoom ka dam toot gaya
Mere mazloom Hussain haye mazloom Hussain
Ye Gham-e-Sibt-e-Nabi goonjega duniya mein sada
Taa dam-e-Marg Sohail hota rahega charcha
Apni baqshish ki zamanath hai Gham-e-Karbobala
Roz-e-Mehshar bhi yehi padhte rahenge nauha
Mere mazloom Hussain haye mazloom Hussain