Hatho pa shaahedee'n ke dam todte hai asghar
Kis yaas o bekasi se dam todte hai asghar
Muh sheh ka waqte aaqir hasrat se dekhte hai
zaahir hai hichkiyo'n se dam todte hai asghar
Gardan se khoo'n rawaa'n hai hoto'n pa nanhi jaa'n hai
Aankhe'n phira phira ke dam todte hai asghar
Ghabra ke nanha syed sheh se lipat gaya hai
baahe'n gale me daale dam todte hai asghar
Dyodi se jab ke poocha bache ka haal maa ne
Rokar kaha ye sheh ne dam todte hai asghar
Aalam hai jaa'n kani ka chehra utar gaya hai
Bekas pidar ke aage dam todte hai asghar
Ghabra rahe hai hazrat qaime me jaake baqir
Bano se koi kehde dam todte hai asghar