ghar se jab bahre safar syed-e- aalam nikle
sar jhukaye huwe ba dida-e- purnam nikle
khai sho farzand kamar baandh ke baaham nikle
roke farmaya ke is shehar se ab ham nikle
raat se girya-e- zehra ki sada aati hai
dekhe'n qismat hame kis dasht me le jaati hai
ruq kiya sheh ne sooe qabre shahinshaahe anaam
bahre tasleem jhuke muttasile baabe salaam
izn padh kar jo gaye qabr ke nazdeek imaam
arz ki aaya hai aaj aaqri ruqsat ko ghulam
ye makaa'n ham se ab aye shaahe zaman chut'ta hai
aaj hazrat ke nawase se watan chut'ta hai
chain se sab hai gharoun me, mujhe milta nahi chain
saqt aafat me hai ab aapka ye noorul ain
tukde dil hota hai jab roke haram karte hai bain
nanhe bachhou ko bhala leke kidhar jaaye hussain
shaher me chain na jangal me amaa'n milti hai
dekhiye qabr musafir ko kaha'n milti hai
ab mere sar ke liye tez huwe hai qanjar
ahl-e- kee'n shar pa kamar bandhe hai ya qair e bashar
aap ne di thi isi roz ki amma ko qabar
waaleda royi thi do roz talak peet ke sar
is nawase ko magar bhool na jaana hazrat
zibha ke waqt madad karne ko aana hazrat
ye wo din hai ke parinde bhi nahi chodte ghar
mujhko dar pesh hai in rozo'n me aafat ka safar
hai kahi'n qatl ka samaan kahi'n lutjaane ka dar
saath hai bachhou ka aye baad e shahe jinn-o- bashar
tang jeene se hu paas apne bulalo nana
apni turbat me nawase ko chupalo nana
ye bayaa'n karke jo taaweez se lipte sarwar
yu hili qabr ke tharrayi zaree-e- anwar
aayi turbat se ye aawaz-e- habeeb-e dawar
teri ghurbat ke mai sadqe mere mazloom pisar
koi samjha na meri god ka pala tujhko
haaye aada ne madine se nikala tujhko
aye mere gesuo'n wale mere saber shabbir
mere bekas mere mazloom musafir shabbir
na raha koi tera yawar-o- naser shabbir
haaye aye gor-e gharibaa'n ke mujawer shabbir
tu jaha'n jayega pyare wahi chalta hu mai
qaak udata huwa turbat se nikalta hu mai
kayee din se teri madar ko nahi qabr me chain
aayi thi shab ko mere paas ye karti huwi bain
ghar mera lut'ta hai faryaad rasool us saqalain
subha ko apna watan chodh ke jata hai hussain
kehne aayi hu ke mu qabr se modungi mai
apne bacche ko akela to na chodungi mai
sunke ye sheh ne kiya aaqri ruqsat ka salaam
nikle rote huwe jab rouza-e- anwar se imaam
qabr par maa ki mujhe le chalo ya shah -e- anaam
log hamraah hai mahmil me, mai kyu kar ro'u
maa ki turbat se phir ek baar lipat kar ro'u
maa ki turbat pa gaye shaah ba chashme qoon baar
utri mahmil se basad aah-o fugha'n zainab-e zaar
doudh kar qabr se lipte jo imaam-e- abraar
haath zehra ki lahad se nikal aaye ek baar
aayi aawaz na ro dil ko qalaq hota hai
qabr hilti hai kaleja mera shaq hota hai
haa bulaao mera abbas-e- dilawar hai kidhar
wo fida hai mere bache pa mai sadqe uspar
shikam-e- ghair se go hai, pa wo mera hai pisar
ye sada sunke baradar ko pukare sarwar
abhi rahwaar ko aage na badhaao bhai
yaad farmati hain amma idhar aao bhai
aake abbas ne sar rakh diya paa'ene mazaar
aayi zehra ki sada mai teri ghurbat ke nisaaar
apne pyarou ke barabar mai tujhe karti hoon pyar
dhyaan bhai ki hifaazat ka rahe aye dildaar
koi ghurbat me use maar na daale beta
mera shabbir hai ab tere hawale beta