dashte ghurbat me watan se shahe dee'n jaate hain
saath sab ghuncha dahan maah-e- jabee'n jaate hain
ghul hai kounain-e- imaamat ke hasee'n jaate hain
qaak hone ke liye arsh nashi'n jaate hain
gulshan-e baad-e- shah-e qilla shikan lut-ta hai
jis me jannat ki fiza thi wo chaman lut-ta hai
haram-e- sheh me hai faryaad-o bukaa se kohraam
bibiyan aayi hai ruqsat ko muhalle ki tamaam
sab se milti hai gale ro ro ke hamsheer-e- imaam
haath mal mal ke ye hamsaaiya'n karti hai kalaam
kya qayamat hai ke veeran ye ghar karte hain
haaye is garmi me shabbir safar karte hain
zikr ye tha ke shah-e yasrab-o bat'ha aaye
ghar me maghmoom-o hazee'n syed-e wala aaye
kaha madar se sakina ne ke baba aaye
boli beemar ke haan mere masiha aaye
sheh ne zainab se kaha aur qalaq badhta hai
aao sughra se bhi ruqsat ho ke din chadhta hai
keh ke ye aaye qaree'n fatima sughra ke imaam
kanpte haato'n se beti ne kiya uth ke salaam
bole chaati se lagakar ye shah-e- arsh maqaam
baitho baitho ke badan zof se larza'n hai tamaam
jo muqaddar me hai wo ranj nahi talta hai
tap se tum jalti ho, gham se mera dil jalta hai
kehke ye baith gaye paas imaam-e do sara
baad alhamd padhi aap ne sehat ki dua aur beemar ko chaati se lagakar ye kaha
beti tum ghar me raho, hai yahi marzi e quda
saath lete jo tawana tumhe paate bibi
aise beemar safar me nahi jaate bibi
gir ke bistar pa ye chillayi basad aah o fugha'n
are logo mujhe thamo ke chali jism se jaa'n
ek ba ek phir gayi qismat ye huwa kya samaa'n
haaye baba mujhe yaan chod ke jaaoge kahan
meri furqat huwi kis tarha gawara baba
be ajal aap ne beemar ko maara baba
na jiyegi, na jiyegi ye mareez-e- ranjoor
haaye mai ghar me rahu aur hu sab se door
chodh de beti ko baba ye naya hai dastoor
afu keeje koi sughra se huwa ho jo qusoor
aatish-e- ranj-o alam se na jaloongi baba
kuch ho mai aap ke hamraah chalungi baba
haath main jodti hoon ab mere achche baba
paaun par girti hu mai, mujh ko na chodo tanha
reham keeje meri minnat pa ye loundi ho fida
meri bimari ka hazrat ko agar hai dhadka
acchi mai ho lu to ho yaa'n se rawana baba
ya mai dunya se guzar jaaun to jaana baba
baate'n sughra ki ye sunte the shah-e- kouno makaa'n
aaye jo itne me hamshakle rasool-e- do jaha'n
dekh kar bhai ko boli wo basad aah -o fugha'n
aao bhayya ali akbar mai tumhare qurbaa'n
apna kuch bas nahi baba to hame chod chale
tum bhi kya qaahar-e- nashad se mu mod chale
ham to mehmaan koi din ke hain jaao bhaai
ab yaqeen hai ke hame aake na paao bhaai
bu mujhe zulfe saman bu ki sunghao bhaai
lu balaye'n mai zara paas to aao bhaai
aalame hijr me dunya se safar karte hain
koi hasrat to na rahjaaye ke ham marte hain
mere aashiq, mere shaida, mere pyare bhaiyya
tum pa is qasta jigar ko koi waare bhaiyya
mujh se ab chut'te ho sadqe mai tumhare bhaiyya
tum chale aur hai bahan gor kinare bhaiyya
pahle turbat pa meri ashk bahate na gaye
qabr beemar ki yasrab me banate na gaye
dekhiye qair se is shehr me kab aaoge
bhai phir chand si surat hame dikhlaoge
apni shadi me bhi nashaad ko bulwaoge
der se aaye to bahna ko na phir paaoge
ye wasiyat hai ke tum ghar me na jaana pahle
sehra latkaaye meri qabr pa aana pahle