pamaal huwa qasim e dilgeer ka laashsa
maqtal ki fizao'n me hai shabbir ka nouha
rudaad sunaye ye kisey ranj o mehan ki
hai doobi huwi khoon me tasveer hasan ki
kistarha diya jayega farwa ko dilasa
talwarou'n ke hamle pa hui teerou'n ki bouchhar
bhaale kabhi barse to kabhi naizo'n ki yalghaar phir ghodo'n se rounda gaya ek pyaase ka seena
kya ajr risalat ka ye ummat ne diya hai
har simt se nargha mere qasim pa hua hai
kis kis ne kiya ek tan e mazloom pe hamla
abbas ke shagird ne ki khoob ladayi
islaam ke dushman pe ki badh badhke chadhayi
dhoke se kiya us pe sitamgaar ne nargha
ek jaan ke dushman the jo har simt se aaye
zarbat koi aage koi peechhe se lagaye
kya zulm se maara gaya seh roz ka pyaasa
ghurbat me luti hai mere bhai ki nashaani
hai khoon meghaltaa'n mere shabbar ki jawani
fariyaad sunaate hain ye karte huwe giriya
is jaa kabhi doude hai to us jaa kabhi doude
ek jaa pe kabhi ruk ke ye rote huwe bole
tukdou'n me bata hai mere qasim ka janaza
mai dekh raha hu'n mere bachche ka janaza
aankho'n se tapakta hai mere khoon jigar ka
mai jeeta raha mar gaya afsos bhatija
shrminda hu'n awaaz lagata raha qasim
aajao chacha keh ke bulaata raha qasim
foujo'n ki safou'n me mujhe milta nahi rasta
dekha tha jigar tumne jo tukdo'n me hasan ka
zainab ye wohi haal hai qasim ke badan ka
matam mere mazloom hasan ka huwa taaza
saqqa e haram karte hain qasim ka jo matam
hoti hai'n turab aankhe'n azadarou ki purnam
tum sab ko dua deti hai maa fatima zehra