LUTAKE AAYI HOON KARBAL MEIN GHAR TERA AMMA
LAHAD PE MAA KI YE ZAINAB KA BAIN THA AMMA
Pada tha dasht mein bhai ka bekafan lasha
Kafan mai dene na payi na thi rida amma
Ridaaye’n chheen ke qaime jalaaye aada ne
Phiraya balwe mein hum sabko berida amma
Tamache bali Sakina ko shumr ne maare
Tadapke rehgaya Beemar-e-Karbala amma
The ek rasan mein bandhe haath saare kunbe ke
Bandha tha nanhi Sakina ka bhi gala amma
Uthaye humne mehan karbala se shaam talak
Chalaya kanto pa aada ne beqata amma
Nashaa’n rasan ke hai baazu pa dekhiye to sahi
Mai sath layi hoon saughaat-e-karbala amma
Mai leke aayi hoon bhai ka khoo’n bhara kurta
Jo waada apse tha poora hogaya amma
Ali ye karti rahi bain Sani-e-Zehra
Huwe hai zulm ki Zainab pa inteha amma