Hai Karbala kay bun mein ghareeboun ka Arbayeen
Shabbir kay mazaar pa Zainab ki hai jabeen
Aansoo bahaa rahey hain khadey Abid-e-hazeen
Abaad thi Hussain kay qadhmoun sey yeh zameen
Ab haal yeh hai sar pa koyi saayebaan nahin
Hai Karbala kay bun mein ghareeboun ka Arbayeen
Maajaaye pehlay aag lagi khaimagaaha mai
Har gaam ek taaza qayaamat thi raaha mai
Bachchi ki hichkiyoun ka hai manzar nigaaha mai
Zindaan-e-Shaam mai hai Sakina yahaan nahin
Hai Karbala kay bun mein ghareeboun ka Arbayeen
Abbas-e-naamwar jo harum ka tha paasbaan
Rothi thi yaad karkay jisey saari bibiyaan
Bey aas jiski laash pah thay Shaahey doh jahaan
Laasha kahin tha haath kahin aur Alam kahin
Hai Karbala kay bun mein ghareeboun ka Arbayeen
Bhaiyya hamaarey waadey ki takmeel hogayi
Aisa safar huva hai kay sar par ridaa na thi
Darbaar-e-Shaam mai thi qayaamat ki beybasi
Rudaad-e-gham sunaaney ki taaqath bhi ab nahin
Hai Karbala kay bun mein ghareeboun ka Arbayeen
Ahley jahaan ko hogi agar haq ki justaju
Akhtar asar dikhaayega mazloom ka lahu
Hai ghamzadaa bahan ki yehi ek aarzu
Aabaad zaayereen sey hojaaye yeh zameen
Hai Karbala kay bun mein ghareeboun ka Arbayeen