Aye Shashmaahe Pyaase Asghar
Aye Qalbe Pidar Jaane Maadar
Aye tashna daha'n Aye tashna jigar
Baba ki Mashiyat par thi Nazar
Jab teer laga tha Gardan par
Rann Jeet liya Tu ne Has kar
Aye Shashmaahe Pyaase Asghar
Aye Faatehe Khaibar ke Dilbar
Ek zarbe tabassum ke bal par
Aada ka ulat'ta Tu lashkar
Shabbir ki Marzi hoti agar
Aye Shashmaahe Pyaase Asghar
Tu Ibne Ali ka hai Beta
Abbase Ali hai Tera Chacha
Hai Tujhme Shuja'at ka Dariya
Aur Shere Khuda ke Hain Tewar
Aye Shashmaahe Pyaase Asghar
Shabbir ke Maqsad ke Qur'an
Gehwaare me Bachcha kehla jaha'n
Aidaan me lekin Tu hai Jawaa'n
Kab khaof hai Tere Chehre par
Aye Shashmaahe Pyaase Asghar
Auro'n se Juda hai Shaan Teri
Ek teer ne leli Jaan Teri
Talwar bani Muskaan Teri
Yu'n fatt'ha Kiya Toone lashkar
Aye Shashmaahe Pyaase Asghar
Uss teer ka khana khel nahi'n
Aur phir Muskana khel nahi'n
Dushman ko rulana khel nahi'n
Hai Teri Shuja'at Tera Jigar
Aye Shashmaahe Pyaase Asghar
Shabbir ke Dilbar Maahjabee'n
Abbas ka Tu Shaagird nahi'n
Hai Jeet ka phir bhi Tujhko yagee'n
Tha Zarbe Tabassum ka jo hunar
Aye Shashmaahe Pyaase Asghar
Ye rasm nahi'n hai Maatam hai
Waajib hai jo ham par wo Gham hai
Ham jaan bhi dede'n to kam hai
Ehsaan kiya Tune ham par
Aye Shashmaahe Pyaase Asghar
Jab Hasta hai Masoom koi
Besaakhta yaad aati hai Teri
Raas aayi na Tujhko Teri Hasi
Ye lag gayi aakhir Kiski nazar
Aye Shashmaahe Pyaase Asghar
Ye zulm kahi'n dekha na suna
Sookhi wo Zubaa'n aur Khushk Gala
Ek boond Tujhe paani na mila
Tu Qatl Huwa Pyaasa Rehkar
Aye Shashmaahe Pyaase Asghar
Jab teer Teri Gardan pa Laga
Aadam ne kaleja Thaam liya
Ayyub ne Apna Muh Phera
Ulta jo Pidar ke Haatho'n par
Aye Shashmaahe Pyaase Asghar
Maa Baap na aise ham dekhe
Hai kaun jo aisa Gham dekhe
Besheer ka ye Aalam dekhe
Ye Sheh ka hai Dil Bano ka Jigar
Aye Shashmaahe Pyaase Asghar
Saamaane Aza me hai Jhoola
Jhoole me Alam ek Chhota sa
Aur uspe bandha hai ek Sehra
Kya khoon rulata hai manzar
Aye Shashmaahe Pyaase Asghar
Gehwaare se wo gir jaana Tera
Maidaan me Sajkar Aana Tera
Wo Joshe Wegha Dikhlana Tera
Kya khoon rulata hai manzar
Aye Shashmaahe Pyaase Asghar
Wo teen dino ki Pyaas Teri
Wo dhoopki shiddat wo garmi
Wo teer ka lagna aur wo hasi
Hairaan hain ab tak jinnobashar
Aye Shashmaahe Pyaase Asghar
Aye Faatehe Dashte Karbobala
Tiflee'n me ye Tera Joshe Wegha
Tu Hota Jawaa'n to kya hota
Ham sonchte hain ye reh rehkar
Aye Shashmaahe Pyaase Asghar
Ehsas ki duniya Rothi hai
Ek Maadar e Dukhiya Rothi hai
Haa'n Fatima Zehra Rothi Hai
Kehti Hai faqat ye Ro Rokar
Aye Shashmaahe Pyaase Asghar
Mango ye DuaMaatam daaro
Ta hashr Kisi dukhiya Maa ko
Aulaad ka Gham is tarha na ho
Bano ne jo Dekhe hain manzar
Aye Shashmaahe Pyaase Asghar
Jis Halq pa teere zulm laga
Us Halg pa Khanjar bhi to chala
Tharraane Laga Tha Arshe Khuda
Naize pa Tera wo Phool Sa Sar
Aye Shashmaahe Pyaase Asghar
Kya kya na huwe the ranjo mehan
Gardan me Sakina ke thi rasan
Ro Ro ke magar Wo Teri Bahan
Kehti Thi Faqat Asghar Asghar
Aye Shashmaahe Pyaase Asghar
Aankho'n me Tere Laashe ko liye
Maa Teri Jiye to kaise Jiye
Paani Wo Piye to kaise Piye
Hardamm hai ye Naoha Honto'n par
Aye Shashmaahe Pyaase Asghar
Wo Ghurbate Sarwar Waawaila
Godi me Liye Tera Laasha
Shabbir ne hamko Yaad Kiya
Ham sadqe Aisi Ghurbat par
Aye Shashmaahe Pyaase Asghar
Shabbir ke jo parwaane hain
Wo Teri Azmath jaane hain
Aur Haq ko Tere pehchaane hain
Gham Tera manaate hain ghar ghar
Aye Shashmaahe Pyaase Asghar
Khaliq Ne jo Bakhsha Tera Gham
Ye Uska bada hai hampa Karam
Ab Tujh se ye wada karte hain ham
Mar jaaengeTujh par ro ro kar
Aye Shashmaahe Pyaase Asghar
Aye Shehre atash ke Shahzade
Tu Apni Ziyarat Karwaade
Karbal me hame ab pohncha de
Rolenge Wahaa'n ham jee bhar kar
Aye Shashmaahe Pyaase Asghar
Ho'n Tujh pa Mere Maa Baap fida
Shahzade ye Ahsan ki hai Dua
Madfan ho Mera bas Karbo bala
Waa'n Naoha Sunaau'n roro kar
Aye Shashmaahe Pyaase Asghar