tashnagi bali sakina ki bujhau'n kaise
kat gaye haath mai mashkiza bachau'n kaise
bola abbas se rehwaar haram pyasa hai
apne hoton se ye paani mai lagau'n kaise
sheh ne zainab se kaha margaye saqqa e haram
apni masoom sakina ko batau'n kaise
gham me abbas e dilawar ke kamar toot gayi
mere akber mai teri laash uthau'n kaise
roke kehti thi sakina ke batao ammu
apne jalte huwe kurte ko bujhau'n kaise
boli zainab ke sakina ki bandhi hai gardan
zalimou'n se mai yateema ko chhudau'n kaise
zaid ne puchha jo naize pa na hone ka sabab
bole abbas mai rudaad batau'n kaise
binte zehra nazar aati hai khule sar mujhko
noke naiza ki bulandi pa mai jau'n kaise
baal chhote hai'n mere sar pa nahi hai chadar
apna chehra phupi amma mai chhupau'n kaise
dhoop me lasha-e-sheh dekh ye kehti thi rabab
koi batlaye to saaye me mai jaau'n kaise
boli banu mere haatho'n me bandhi hai rassi
tujhko asghar mai kaleje se lagau'n kaise
apni khilqat huwi tabish ghame sarwar ke liye
gham me shabbir ke aansu na bahau'n kaise