salam khaak nasheeno pa sogwaro ka
ghareeb dete hai pursa tumhare pyaro ka
salam un pa jinhe sharm khaaye jaati hai
khule saro'n pe aseeri ki khaak aati hai
salam us pa jo zahmat kashe salaasil hai
musibato'n me imamat ki pehli manzil hai
salam bhejte hai apni shahzadi par
ke jisko sawnp gaye marte waqt ghar sarwar
musafirat ne jise bebasi ye dikhlayi
nisar kar diye bache na bach saka bhai
aseer ho ke jise shaamiyo ke narghe me
husainiyat hai sikhaana ali ke lehje me
sakina bibi tumhare ghulam haazir hai
bujhe jo pyas to ashko'n ke jaam haazir hai
ye sin, ye hashr ye sadme naye naye bibi
kaha'n pa baithi ho qaime to jal gaye bibi
pahaad raat badi der hai sawere me
kaha'n ho shaam-e-ghareeba'n ke ghup andhere me
zameen garm, yateemi ki saqtiya'n bibi
wo seena jis pa ke soti thi ab kahan bibi
janaab-e-maadar-e-besheer ko bhi sab ka salam
ajeeb waqt hai kya de'n tasalliyo ka payaam
abhi kaleje me ek aag si lagi hogi
abhi to godh ki garmi na kam hui hogi
nahin andhere me kuch soojhta kaha'n dhundhen
tumhara chaand kaha'n chhup gaya kaha'n dhundhen
na is tarah koi kheti hari bhari ujdi
tumhari maang bhi ujdi hai godh bhi ujdi
nahi layeeno me insaa'n koi khuda hafiz
darinde aur ye be-waarisi khuda hafiz
shareek-e-haq darood-o-salam-e-paighambar
salam sayyid-e-lawlaak ke lute ghar par
salam mohsin-e-islam khasta tan laasho
salam tum pe shaheedo ke be kafan laasho
salam tum pe rasool-o-batool ke pyaro
salam mehr-e-shahadat ke gird sayyaaro
bache to agle baras ham hai'n aur ye gham phir hai
Jo chal base to ye apna salaam-e-aakhir hai