jis dam hassan ka zaher se tukde jigar huwa
saipaara dil ka aaho'n se ze-ro- zabar huwa
sam ka jo roo-e- paak pa zaahir asar huwa
haal us imam-e- paak ka is dam digar huwa
raahat me farq aur shikam me qalal pada
kat kar kaleja tasht ke andar nikal pada
bistar pa dard-e- dil se tadapne lage imam
sadme se sabz hone laga rooe surq faam
chillaye haath se ye kaleje ko thaam thaam
doudo bahan ke kaam hamara huwa tamam
ye kehte kehte zard ruq-e- paak hogaya
chillate the ke haye jigar chaak hogaya
doudhi'n janab-e- zainab-e bekas barahna pa
dekha ke lot-te hai bichone pa mujtaba
boli ye sar ko peet ke wo gham ki mubtela
hai hai bahan nisar ho bhai ye kya huwa
kya phir kisi ne zeher dagha se piladiya
kis ne mere kaleje pe khanjar chala diya
takya laga rahe the haram jo idhar udhar
baazu ko thaam leti ,thi koi to koi sar
farmaya laao tasht, huwa zeher ka asar
reh reh ke koi kaat'ta hai tegh se jigar
badhta tha jab ke dard jigar me imaam ke
jhukte the baar baar kaleje ko thaam ke
zainab ne jald laake rakha samne lagan
hathou'n se dil pakad ke jhuke sarwar-e- zaman
aayi jo qai to kaane jawaahar bana dahan
almaas khake laal ugalne lage hassan
range zamroodi ka asar ab ayaa'n huwa
meraaj ki hadees ka matlab ayaa'n huwa
farmate the hassan ke bulaao hussain ko
tha dambadam ye hukm, ke laao hussain ko
bhaai ka haale zaar sunaao hussain ko
tukde mere jigar ke dikhao hussain ko
kehdo ke jald aaiye rehlat ka waqt hai
sun jaiye kuch aake wasiyat ka waqt hai
aaye hussain itne me baa chashm ashkbaar
chillate the ke aapki ghurbath ke mai nisaar
shabbar gale ko choom ke kehte the baar baar
mai tum pa sadqe aye mere nana ke yaadgaar
mujh se ziyada zulm-o- sitam tum pa hoyenge
ham qabr me tumhari musibath pa royenge
bhaiyya tumhari god me niklega mera dam
tum doge hamko ghusl-o- kafan jab marenge ham
hoga tumhare paas na koi bajuz alam
qatil sarhane hoyega ya khanjar-e- sitam
shabbar to baad-e marg bhi raahat se soyega
laasha tumhara ghodou'n se pamaal hoyega
bole katora leke hussain-e falak janaab
dekhu to peeke mai bhi ke kis tarha ka hai aab
bhai se lipti doud ke zainab jigar kabaab
pakda hassan ne daste baradar basad shitaab
jaldi se pee na le ye qalaq tha imam par
ek haath tha kaleje pa ek haath jaam par
darde jigar se ghash huwe shaah-e- falak janaab
ghamgee'n to the hussain huwa aur izteraab
haazir thi rooh-e ahmed-o- zehra o- buturaab
wa aasmaa'n pe hogaye baagh-e- jinaa'n ke baab
sar peeto momino ke khazaa kar gaye hassan
bin bhai ke hussain huwe margaye hassan
barpa tha ahle bait-e-payambar me shor-o shain
behne pachade'n qhaak pa khaati thi karke bain
chaati pe haath maarke chillate the hussain
ab uth gaya zamane se ham bekasou'n ka chain
dil ab hamara toot gaya wa musibata
baap aaj hamse choot gaya wa musibata
ek ek ko rokte the imam-e- falak sareer
aane lage janaze pa jo us taraf se teer
kaanpi zameen hilgaya sadme se charqe peer
nikli lahad se fatima jebe- kafan ko cheer
taboot par nawase ke bid'at jo hoti thi
roohe rasoole paak janaze pa roti thi