Mujrayi koi na karta tha dawaae sajjad
shimr ka hukm tha pani bhi na paae sajjad
qoone dil peete the aur baap ka gham khaate the
thi maraz me wo dawa aur ye ghizaae sajjad
teen shaqso ka hai aafaaq me rona mash'hoor
giryae aadamo yaqoobo bukaae sajjad
darde dil daaghe rasan maatame shaahe shohada
leke soughaat madine me ye aaye sajjad
ae falak ba rehna paa dhoop me kaanto pe rawaa'n
koi beemar bhi dekha hai siwaae sajjad
kyu na mohtaaj kafan ke ho hussain ibne ali
na to zainab ki rida thi na abaae sajjad
har qadam par yahi zanjeer se aati thi sada
ayyuhan naas nahi kuch bhi qataae sajjad
kehte the raah me karde koi ek saaghare aab
fateha waalide bekas ka dilaae sajjad
jab ke manzil pe utarte the sare shaam adu
bibiya chunti thi qaare kafe paaye sajjad
nange sar oonto pe zahra ka jo kunba tha sawaar
jaate the sharm se gardan ko jhukaae sajjad
yu riwaayat hai ke zindaane sitam se chut kar
baap ki laash pe chehlum ko jab aaye sajjad
roke farmaaya ye qismat me mere likkha tha
sathra qabre azeezo ki banaaye sajjad