Haaye hussain pyaase hussain
Damishk me jo ghareebo ka qafela pohncha
yazeede nehes ne darbaar me bula bheja
Behen se sheh ki shahadat ka waqeya poocha
tadap ke binte ali ne yazeed se ye kaha
Zamee'n ki god me islaam ka sitara hai
Mere ghareeb ko laakho'n ne milke maara hai
Kaha yazeed se zainab ne ae sitam aara
Ghazab kiya tere lashkar ne roze aashoora
mere hussain ko jungle me gher kar maara
Ali ka kardiya barbaad ghar ka ghar saara
Jo bekafan hai abhi tak nabi ka pyaara hai
Mere ghareeb ko laakho'n ne milke maara hai
Suhaag ujda kisi ka kisi ki kkookh jali
kisi ka jal gaya daaman rida kisi ki chini
Kisi ki maang me karbobala ki qaak padi
kisi ki aal hai zindaa'n me ya Ali madadi
Jaha'n me zainabe dilgeer be sahara hai
Mere ghareeb ko laakho'n ne milke maara hai
Shaheed ho gaye abbas o qasimo akber
Wo mere auno mohammed wo mere noore nazar
Mai tujh ko dhoondu'n kaha'n bezabaa'n ali asghar
bataao bibiyo'n ro'un mai aaj kis kis par
Shaqi ne sibte payambar ka sar uthaara hai
Mere ghareeb ko laakho'n ne milke maara hai
Ye ranjo gham sitamo zor aur jafa kab tak
Rasool zaadiya'n balwe me berida kab tak
Rahegi qaid me aulaade murtaza kab tak
nabi ki aal pe ye zulme naarawa kab tak
Mujhe toh mout hi aalam me ab gawaara hai
Mere ghareeb ko laakho'n ne mil kay maara hai