Aahe soza'n lab tak aayi ashke naab aane ko hai
josh me gul hai dhua'n uttha gulaab aane ko hai
saamne aadil ke asyaa'n se hijaab aane ko hai
doudaaaye rehmat ke ab farde hisaab aane ko hai
naza me karlu ziarat aye ajal dam le abhi
jo mera mushkil kusha hai wo janab aane ko hai
ae farishto ek dam tham jaao phir karna sawaal
mera moula behre talqeene jawaab aane ko hai
maatame shabbir me uth'ta hai ro kar koun koun
dekhie kis kis ke hisse me sawaab aane ko hai
sheh ko peeri me dikhaata hai falak akbar ka daagh
hoke ruqsat ghar se nikle hai uqaab aane ko hai
saal hai atthaarwa aariz pe sabza hai namood
husn mit jaane ko hai marge shabaab aane ko hai
qatl karne laate hai kothe pe muslim ko layee'n
waqte aaqir hai labe baam aaftaab aane ko hai
tasht me sarwar ka sar hai aur sare darbaar aah
sar barehna zainebe asmat maab aane ko hai